سلسلے توڑ گیا وہ سبھی جاتے جاتے

سلسلے توڑ گیا وہ سبھی جاتے جاتے

ورنہ اتنے تو مراسم تھے کہ آتے جاتے

شکوہ ظلمت شب سے تو کہیں بہتر تھا

اپنے حصے کی کوئی شمع جلاتے جاتے

کتنا آسان تھا تیرے ہجر میں مرنا جاناں

پھر بھی اک عمر لگی جاں سے جاتے جاتے

جشن مقتل ہی نہ برپا ھوا ورنہ ہم بھی

پابجولاں ہی سہی ناچتے گاتے جاتے

اس کی وہ جانے اسے پاس وفا تھا کہ نہ تھا

تم فراز اپنی طرف سے تو نبھاتے جاتے

احمد فراز